Top Headlines:

वाइडबडी प्रकरण : कारबाही गर्न अख्तियारकै आलटाल !

काठमाडौँ– सार्वजनिक लेखा समितिले नेपाल वायु सेवा निगमको वाइडबडी जहाज खरिदका क्रममा भ्रष्टाचारमा मुछिएकाहरूलाई कारबाही गर्न निर्देशन दिएको महिनौँ विते पनि अख्तियार दुरूपयोग अनुसन्धान आयोगले कारबाही प्रक्रिया अघि बढाउन आलटाल गरेको पाइएको छ ।  

लेखा समितिले वाइडबडी खरिद प्रकरणमा भ्रष्टाचार भएको प्रतिवेदनसहित त्यसमा संलग्नहरूलाई कारबाही गर्न अख्तियार र सरकारलाई पुस २३ गते निर्देशन दिएको थियो । 

लेखा समितिले उक्त प्रकरणमा निगमका महाप्रबन्धक सुगतरत्न कंसाकारसहित अन्य पदाधिकारी तथा पर्यटन मन्त्रालयका बहालवाला सचिव, पूर्वसचिव तथा मन्त्री र पूर्वमन्त्रीसमेत भ्रष्टचारमा संलग्न भएको ठहरसहित कारबाही प्रक्रिया अघिबढाउन निर्देशन दिएको थियो । तर सरकार र अख्तियारले हालसम्म उक्त प्रतिवेदनबार गहिरो अनुसन्धान गर्ने जाँगर नै देखाएको छैन । 

यो प्रकरणमा मुछिएकाहरूले उच्च राजनीतिक नेतृत्वलाई समेत औंल्याएपछि सरकारले लेखा समितिलाई बाइपास गरेर आफैले उच्चस्तरीय छानविन समिति गठन गरेको थियो । त्यो समितिले समेत कुनै छानविन नगर्नु र अख्तियारले पनि कारबाही प्रकृया अघि नबढाउनुले वाइडबडी खरिद भ्रष्टचार प्रकरण थप रहस्यमय बन्दै गएको सरोकारवालाहरुको भनाइ छ ।

समितिले नेपाल वायुसेवा निगमका दुईवटा वाइडबडी खरिद गर्दा ४ अर्ब ३५ करोड अनियमितता भएको प्रतिवेदन सार्वजनिक गरेको थियो । त्यही प्रतिवेदनका आधारमा थप अनुसन्धान र कारबाही प्रकृया अघि बढाउन लेखा समितिले आयोगलाई पत्र पठाएको हो । 

समितिले वाइडबडी अनियमितताबारे एक महिनाभित्र प्रगति विवरण बुझाउन अख्तियार दुरूपयोग अनुसन्धान आयोगलाई पठाएको पत्रको जवाफमा आयोगले अहिलेसम्म समितिलाई विशेष समिति बनाएर अनुसन्धान गरिरहेको भन्ने सामान्य जानकारी मात्रै पठाएको छ । कति र कस्तो अनुसन्धान भइरहेको छ भन्ने अख्तियारले लेखा समितिलाई पठाएको जवाफमा केही खुलाएको छैन । 

‘अख्तियारले सहसचिवको नेतृत्वमा विशेष समिति बनाएर प्रारम्भिक छानविन गरिरहेको भनेर समितिमा पत्र पठाएको छ । कस्तो अनुसन्धान र कसरी भइरहेको भन्ने खुलाएको छैन’, लेखा समितिका सदस्य राजेन्द्र केसीले बताए । उनले भने, ‘लेखा समिति कारबाही गर्ने निकाय होइन, कारबाही गर्ने निकाय अख्तियार नै हो । कसरी र कहिलेसम्म कारबाही हुन्छ भनेर सोधिरहने कुरा पनि भएन ।’ 

पुस दोस्रो साता वाइडबडी प्रकरणमा संसददेखि सडकसमेत ताते पनि पछिल्लो समय यो प्रकरणमा सत्तारुढदेखि प्रतिपक्षसम्म तैँचुप मैचुप रहँदा सेलाउँदै गएको त होइन भन्ने प्रश्न उठेको छ । संसदमा केही दिन वाइडबडीको विषय उठाएर चर्को स्वरमा खबरदारी गरेका प्रतिपक्षी काँग्रेसका सांसदहरू आफ्नै सभापति शेरबहादुर देउवाको समेत नाम जोडिएपछि चुपचाप बसेका छन् ।