Top Headlines:

विमलेन्द्र निधिले फिर्ता लिए राजीनामा, आजै बाट मन्त्रालय सम्हाल्ने

वैशाख २१, २०७४- विमलेन्द्र निधिले उपप्रधान तथा गृहमन्त्री पदबाट दिएको राजीनामा फिर्ता लिएका छन् । फिर्ता लिएसँगै उनले मन्त्रालयको जिम्मेवारी सम्हाल्ने भएका छन् । प्रधानमन्त्री पुष्पकमल दाहाल, नेपाली कांग्रेस पार्टी सभापति शेरबहादुर देउवा र निधिबीच बिहीबार बिहान भएको छलफलपछि निधिले राजीनामा फिर्ता लिएका हुन् । 

छलफलमा दाहाल र देउवाले एकैसाथ चुनाव सफल पार्नुपर्ने भन्दै  राजीनामा फिर्ता लिन आग्रह गरेका थिए ।  दुवैको आग्रहपछि निधिले राजीनामा फिर्ता लिने र आजै गृह मन्त्रालयको जिम्मेवारी सम्हाल्न राजी भएका थिए । 

उनी जिम्मेवारी सम्हालेर जानकी नवमीको लागि जनकपुर जाँदैछन् । 

गृहमन्त्री निधिले राजीनामा दिएपछि मन्त्री निवास पुल्चोकबाट आफ्ना सामान नयाँ बानेश्वरस्थित घरमा सारिसकेा थिए । तर आज उनले जनकपुरबाट फर्केपछि मन्त्री निवासमा नै सर्ने योजना बनाएका छन् ।

त्यसो त बुधबार राति पनि देउवा र निधिबीच राजीनामाबारे छलफल भएको थियो । स्रोतका अनुसार  बुधबार रातिको भेटमा देउवाले 'अब १० दिनको लागि नयाँ गृहमन्त्री किन बनाउने राजीनामा फिर्ता लिनुस्' भनेर भनेका थिए । त्यसपछि निधि सकारात्मक देखिएका थिए । 

निधिले देउवासामू प्रधानन्यायाधीश सुशीला कार्कीमाथि लगाइएको महअभियोगबारे आफूलाई जानकारी नै नदिइएको भन्दै असन्तुष्टी पोखेका थिए । 

कार्कीविरुद्ध महाअभियोग दर्ता भएपछि कांग्रेसको तर्फबाट सरकारमा नेतृत्व गरेका निधीले गृहमन्त्रीबाट राजीनामा दिएका थिए ।

निधिको कार्कीमाथि लगाइएको महअभियोगमा असन्तुष्टी भने छँदै छ ।